Վ4-ը հանուն ՏԻՄ-երում երիտասարդների ներգրավման. Աշխատաժողով Երեւանի երիտասարդության համար
Հունվարի 26, 2020թ., Երեւան
«Ազատ քաղաքացի» քաղաքացիական նախաձեռնությունների աջակցման կենտրոնը՝ Վիշեգրադի միջազգային հիմնադրամի (Սլովակիա) աջակցությամբ շարունակում է «Վ4-ը հանուն ՏԻՄ-երում երիտասարդների ներգրավման» ծրագրի իրականացումը: Ծրագրի նպատակն է զարգացնել երիտասարդ քաղաքացիական ակտիվիստների կարողությունները ՏԻՄ-երի գործունեության մեջ ներգրավման, դրանց մշտադիտարկման եւ վերահսկողության գործում, բարձրացնել նրանց իրազեկվածությունը Եվրոպական կառույցների, ինստիտուտների եւ Հայաստանում իրագործվող դրանց ծրագրերի վերաբերյալ, այդ թվում՝ Եվրամիության, Եվրոպայի Խորհրդի, Արեւելյան գործընկերության, Վիշեգրադ – 4 ձեւաչափի:
Սա Ծրագրով նախատեսված 17 աշխատաժողովներից 11-րդն էր, որը տեղի ունեցավ Երեւանի երիտասարդության համար 2020թ հունվարի 26-ին, Ռազմավարական եւ ազգային հետազոտությունների հայկական կենտրոնի փոքր դահլիճում: Ծրագրի մասնակցեցին 16-30 տարեկան 16 երիտասարդներ, ովքեր հետաքրքրված են սեփական համայնքների անցուդարձով, դրանց զարգացման, ռեսուրսների կառավարման եւ ՏԻՄ գործունեության հարցում:
Աշխատաժողովում քննարկվեցին նաեւ հետեւյալ երիտասարդական խնդիրներ, որոնք մասնակիցները համարեցին առավել արդիական եւ կարեւոր իրենց տարածաշրջանի համար.
- ՏԻՄ-երում երիտասարդության ներգրավման ցածր մակարդակը.
- Երիտասարդության իրավագիտակցության ցածր մակարդակ.
- Կրթություն:
Վերջում երիտասարդներին հանդիպեցին, պատասխանեցին նրանց հարցերին եւ կիսվեցին սեփական փորձով Երեւան քաղաքի ավագանու անդամներ, ՙՙԻմ քայլը՚՚ խմբակցության քարտուղար Հասմիկ Խաչունցը եւ խմբակցության անդամ, ՙՙՄշակույթի, կրթության, և սոցիալական հարցերի՚՚ մշտական հանձնաժողովի անդամ Գրիգոր Երիցյանը:
Աշխատաժողովի օրակարգն այստեղ է:
—————————————————————————————————
Ծրագրի շրջանակներում «Ազատ քաղաքացի» քաղաքացիական նախաձեռնությունների աջակցման կենտրոնի գործընկերներն են ԳԼՈԲՍԵԿ (GLOBSEC – Գլոբալ անվտանգություն, Սլովակիա), ՍԱԼՏՈ Երիտասարդության Արեւելյան Եվրոպայի եւ Կովկասի ռեսուրսներ (SALTO, Լեհաստան), ԱԳՈՐԱ (AGORA, Չեխիայի Հանրապետություն), Բուդապեշտի Քաղաքականությունների վերլուծության ինստիտուտ (BIPA, Հունգարիա), Հայաստանի համայնքների միություն:
